(Ռ.Վ. 5 դեկտեմբեր 2014) Ուրբաթ, 5 դեկտեմբերին, Իտալիոյ Թրէնթօ քաղաքի
''Ռիվա Տէլ Կարտա'' շրջանին մէջ տեղի ունեցաւ ընտանիքի նուիրուած 3-րդ փառատօնը՝ կազմակերպութեամբ
շրջանի քաղաքական պատասխանատուներուն եւ Թրէնթոյի քաղաքապետարանին։ Փառատօնի խորագիրն
է ''բանուորուհիներ, բարօրութիւն եւ տնտեսական բարգաւաճում''։ Փառատօնի բացման արարողութեան
առթիւ, Թրէնթօ թեմի արքեպիսկոպոս Գերապայծառ Լուիճի Պրէսսան ներկաներուն փոխանցեց Ֆրանչիսկոս
Քահանայապետի պատգամը, որուն մէջ Նորին Սրբութիւնը յայտնած է իր երախտագիտութիւնը փառատօնը
կազմակերպողներուն, ինչպէս նաեւ անոր բոլոր մասնակիցներուն։ Ֆրանչիսկոս Պապը անդրադարձած
է ընկերային եւ եկեղեցական հասարակութենէ ներս ընտանիքի ունեցած կարեւոր դերակատարութեան
մասին, ընդգծելով, թէ մարդկութեան ապագան կը կառուցուի ընտանիքին միջոցաւ։ Իր պատգամին
մէջ Քահանայապետը ակնարկած է ընտանիքի իրաւունքներուն եւ իւրայատուկ առաքելութեան մասին՝
ընտանիքի անդամներուն ծառայութեան նկատմամբ, կարեւոր նկատելով ընտանիքի ներդրումը
հասարակաց կեանքէն ներս։ Անդրադառնալով բանուորուհիներու աշխատանքի մասին, ֆրանչիսկոս
Պապը թելադրած է թէ՝ տնտեսական պահանջքի պատճառաւ կինը պէտք չէ որ ամբողջովին լուծուի
դժուար եւ ծանր աշխատանքներու, պէտք է նկատի առնուին անոր ընտանեկան պարտականութիւնները
որոնք անհրաժեշտ են ընկերային կեանքին եւ անոր ապագայի՝ կերտումին։ ֆրանչիսկոս Պապը
իր ճառին աւարտին մաղթանք յայտնած է որ ընտանիքի նուիրուած փառատօնը պտղաբեր հանդիսանայ,
ապա՝ ապահովեցնելով իր աղօթքը, բոլորին շնորհած է իր առաքելական օրհնութիւնը, ի նշան
աջակցութեան, բոլոր ծրագիրներուն որոնք կը նպաստեն ընտքանիքին՝ որ է ու կը մնայ կենսական
բջիջը ընկերային կեանքին։